សន្និសីទសារព័ត៌មាន៖ ការប្រគល់ថវិកាសម្បុរសធម៌ពីកម្មវិធីប្រគំតន្ត្រី “ពេលវេលាដែលត្រូវតបស្នង”
20-November-2015 | ដោយ មួយឡា
ភ្នំពេញ៖ ក្រោយព្រឹត្តិការណ៍ប្រគំតន្ត្រីពេលវេលាដែលត្រូវតបស្នង កាលពីថ្ងៃទី១៤ វិច្ឆិកា ២០១៥ នៅទីស្តីការក្រសួងពាណិជ្ជកម្ម នាថ្ងៃទី១៩ វិច្ឆកា ២០១៥ មានការរៀបចំសន្និសីទសារព័ត៌មាន ដែលមានលក្ខណៈជាពិធីប្រគល់ថវិកាសប្បុរសធម៌ រ៉ៃអង្គាសបានក្នុងអំឡុងពេលប្រគំតន្ត្រីក្រោមប្រធានបទ៖ “ពេលវេលាដែលត្រូវតបស្នង-វិភាគទានចំពោះអធិរាជសម្លេងមាសកម្ពុជា ស៊ីន ស៊ីសាមុត”។
ពិធីនេះត្រូវបានរៀបចំឡើងដោយ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងពាណិជ្ជកម្ម និងលោកជំទាវ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ ដើម្បីប្រគល់ថវិកា រ៉ៃអង្គាសបានពីការប្រគំតន្ត្រី ជូនលោកស្រី ខាវ ថងញ៉ុត ភរិយារបស់អធិរាជសម្លេងមាស ស៊ីន ស៊ីសាមុត លោកស្រី រស់ សាបឿន ជាបងស្រីរបស់លោកស្រី សេរី សុទ្ធា តំណាងសមាគមន៍សិល្បករជំនាន់ដើម តំណាងមន្ទីរពេទ្យព្រះអង្គឌួង និងតំណាងមន្ទីរពេទ្យគន្ធបុប្ជា។
ថវិការ៉ៃអង្គាសសរុបមានចំនួន ១០,៧៣៥,៥៤៥ ដុល្លារសហរដ្ឋអាមេរិក ត្រូវបានបែងចែកដូចខាងក្រោម៖ ក្រុមគ្រួសារលោក ស៊ីន ស៊ីសាមុត ទទួលបានចំនួន៥០% មន្ទីរពេទ្យគន្ធបុប្ជាចំនួន២០% មន្ទីរពេទ្យព្រះអង្គដួងចំនួន១០% ក្រុមគ្រួសាររបស់លោកស្រី រស់ សេរី សុទ្ធាចំនួន៥% និងសមាគមន៍សិល្បករសិល្បការនីសម័យដើមចំនួន១៥%។
ឆ្លៀតក្នុងឱកាសនេះ ឯកឧត្តមទេសរដ្ឋមន្ត្រី ស៊ុន ចាន់ថុល បានថ្លែងអំណរគុណយ៉ាងជ្រាលជ្រៅដល់អ្នកឧបត្ថម្ភកម្មវិធី និងអ្នកគាំទ្រទាំងអស់ ក្រុមការងាររៀបចំកម្មវិធី និងសិល្បករសិល្បការនីសម្តែងទាំងអស់ ដែលបានខិតខំប្រឹងប្រែងចូលរួមចំណែកជាប្រវត្តិសាស្ត្រ និងការចំណាយពេលវេលាដ៏មានតម្លៃរបស់ខ្លួន ដើម្បីធ្វើឲ្យការប្រគំតន្ត្រីនេះ ទទួលបានជោគជ័យសម្រាប់វិស័យសិល្បៈ និងប្រជាជាតិខ្មែរ៕
ប្រភព៖ ទំព័រក្រសួងពាណិជ្ជកម្ម
ចំនួនអ្នកទស្សនា
- ថ្ងៃនេះ13361
- ម្សិលមិញ15681
- សប្តាហ៍នេះ72201
- ខែនេះ94081
- ឆ្នាំនេះ94081
- សរុប20536537